HATAW! D'yaryo ng Bayan hatawtabloid.com
HATAWAN
ni Ed de Leon
BIGLANG putok ang post ng komedyanteng si Pokwang tungkol sa naging buhay niya kasama ang Kanong si Lee O’Brian. Ang natatandaan namin, nakasama lang ni Pokwang iyang Lee noong ginawa niya iyong pelikulang indie na EDSA Woolworth noon sa US. Hindi namin kilala iyang Lee kung artista ba iyan sa America, isang bit player lang o kung ano iyan. Alam naman ninyo sa Pilipinas, basta Kano iniharap sa isang press conference pinalalabas nang malaking artista.
Nagkagustuhan naman sila at nagkaroon ng isang anak. Pero ngayon inaamin na ni Pokwang na buong panahon ng kanilang pagsasama, kailangan siyang kumayod para mabuhay ang kanilang pamilya, wala palang trabaho iyang Lee.
Makalipas ang ilang taon, naisip din siguro ni Pokwang na may anak nga siyang Tisay pero siyang mag-isa lang naman ang nagtataguyod doon, at pati na sa tatay niyon. Iyon ang dahilan kung bakit siya nakipaghiwalay doon sa Kano.
Ewan naman kung sino ang sinasabi ni Pokwang na mukhang may interest din doon sa Kano at bina-bash pa siya. Kaya nakahihiya man, inamin ni Pokwang na siya man ay nabola lang din.
Magandang ang kuwento ni Pokwang, dahil iyan ay kapupulutan ng magandang aral ng mga taong “nahuhulog” dahil sa magandang hitsura ng tao, at hindi naiisip kung ano ang kalalabasan nila sa kinabukasan.
Aba eh bago kayo magmahal ng iba, mahalin muna ninyo ang sarili ninyo.
