HATAW! D'yaryo ng Bayan hatawtabloid.com
KULONG na ang dalawang tulak ng droga, kabilang ang isang miyembro ng “Zaragosa drug group” matapos makuhanan ng nasa 570 gramo ng marijuana sa isinagawang buy-bust operation ng pulisya sa Navotas City, kamakalawa ng gabi.
Kinilala ni Navotas City police chief P/Col. Dexter Ollaging ang naarestong mga suspek na sina Jomari Casbadillo, 28 anyos, (pusher/listed) at Mark Joseph Nicandro alyas “Mac-Mac”, 35 anyos, kapwa residente ng F.Pascual St., Brgy. Daanghari ng nasabing lungsod.
Ayon kay Col. Ollaging, dakong 10:30 ng gabi nang magsagawa ang mga operatiba ng Station Drug Enforcement Unit (SDEU) sa pangunguna ni P/Capt. Luis Rufo Jr ng buy- bust operation sa harap ng bahay ng mga ito sa nasabing lugar.
Nang tanggapin ni Casbadillo ang P500 marked money mula sa isang pulis na nagsilbi bilang poseur buyer kapalit ng isang knot-tied transparent plastic bag ng marijuana ay agad siyang sinunggaban ng mga operatiba kasama ang kanyang kasabwat.
Nakumpiska sa mga suspek ang humigi’t kumulang 570 grams ng hinihinalang pinatuyong dahon ng marijuana na may standard drug price (SDP) P68,400, buy- bust money, sling bag at P500 recovered money.
Ani P/Capt. Rufo, mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)
