HATAW! D'yaryo ng Bayan hatawtabloid.com
HATAWAN
ni Ed de Leon
HUMIHINGI na naman ng paumahin si James Reid at humihingi ng pang-unawa dahil hindi na naman matutuloy ang sinasabi niyang North American concert tour. In the first place, mayroon na nga ba talagang arrangement o plano pa lang? Mukhang mahina ang kanyang production company sa ganyan, iyon nga lang music fest nila sa Cebu naging isang malaking disaster para sa kanila, tapos ngayon sasabak pa sa north America?
Sa Cebu kahit na ano ang sabihin mo may nakakikilala kay James dahil sa mga pelikula niya noong araw, eh sa North American territories, sino ba ang nakakikilala kay James Reid? Hindi standout ang mga Tisoy doon, dahil lahat sila Tisoy. Matindi rin ang kompetisyon sa musika roon, at napakaraming sikat na artists na mas panonoorin nila kaysa kay James.
Ang totoo, isa kami sa nanghihinayang diyan kay James. Kasi iyang mga pinapasok niyang proyekto ay puro suntok sa buwan. Kung iyon ba naman nagsisikap muna siya rito sa Pilipinas na sumikat din naman siya kahit na paano, may natitira pa naman siyang fans siguro na susuporta sa kanya, at saka dito standout ang kanyang hitsura, baka mas may chances pa siya.
Kagaya rin niyong narinig naming isang comment na pogi raw siya at sexy pa, na siguradong papatok kung magpapa-sexy sa pelikula.
Hindi naman siguro siya kailangang gumawa ng kahalayan na kagaya ng inilalabas ngayon sa internet, iyong sexy comedies lang ok na. Palagay namin magki-click siya sa ganoon. Hindi masama ang mataas na pangarap, pero dapat isipin mo rin kung ang mataas na pangarap na iyan ay possible ba o hindi.
