HATAW! D'yaryo ng Bayan hatawtabloid.com
RATED R
ni Rommel Gonzales
MAY panibagong kontrabidang kinakaharap ngayon ang Kapuso actress na si Kate Valdez sa GMA Afternoon Prime series na Unica Hija.
Ito ay si Mark Herras na gumaganap na matandang bersiyon ng kaibigan ni Bianca (Kate Valdez) na si Zach.
Ang aktor na si Kych Minemoto ang gumanap na young Zach sa Unica Hija.
Head over heels para kay Bianca si Zach kaya naman hanggang sa pagtanda nito ay nadala niya ang infatuation sa yumaong kaibigan.
Dahil sa obsession ni Zach kay Bianca, bumalik ang kanyang feelings nang makita niya ang clone ng huli na si Hope, na ginagampanan din ni Kate.
Pinagkatiwalaan ni Hope si Zach na tutulungan siya nitong hanapin ang kanyang mga tunay na magulang pero lalo pa siyang nalagay sa panganib.
Kinidnap at itinago sa isang bahay ni Zach si Hope dahil kamukang-kamukha nito si Bianca.
Kung tutuusin, may pagka-psychopath ang karakter ni Mark sa Unica Hija, bagay na ikina-stress ng mga manonood.
“Creepy” nga raw ang role ni Mark sa Kapuso afternoon drama. Sa kuwento, natagpuan ni Zach si Hope sa parehong edad kung kailan namatay si Bianca. Maaaring doble ang agwat ng edad ni Zach kay Hope.
Samantala, kung marami ang naiinis kay Zach, ilan din ang nagpahayag ng kanilang interes sa story twist na ito sa Unica Hija na may temang psychological.
Patuloy itong subaybayan weekdays, 3:25 p.m., pagkatapos ng Abot Kamay Na Pangarap sa GMA Afternoon Prime.
Ang livestreaming ng serye ay available sa GMANetwork.com at sa official Facebook page at YouTube channel ng GMA Network.
