Rank 6 MWP ng Navotas ‘nalambat’  sa Malabon

NAARESTO ang isang lalaking nakatala bilang rank 6 most wanted person (MWP) sa Navotas City dahil sa kasong panggagahasa nang malambat ng pulisya sa manhunt operation sa Malabon City, kamakalawa ng hapon.

Kinilala ni Navotas City police chief P/Col. Dexter Ollaging ang naarestong suspek na si Rommel Declaros, 24 anyos, residente sa Ugnatan St., Brgy. Concepcion, Malabon City.

Sa report ni Col. Ollaging kay Northern Police District (NPD) District Director, P/BGen. Ponce Rogelio Peñones, Jr., nakatanggap ng impormasyon ang mga operatiba ng Warrant and Subpoena Section (WSS) ng Navotas police na naispatan ang presensiya ng akusado sa Brgy. Tañong, Malabon City.

Dakong 1:30 pm, kasama ang CIDG-SOU at DSOU-NPD sa pangunguna ni P/Major Felix Venancio Rivera, agad nagsagawa ang mga operatiba ng WSS ng joint manhunt operation in relation to SAFE NCRPO na nagresulta sa pagkakaaresto kay Declaros sa Leaño St., Brgy. Tañong.

Si Declaros ay dinakip ng pulisya sa bisa ng warrant of arrest na inisyu ng Family Court Branch 9, Navotas City noong 14 Nobyembre 2022, para sa kasong Rape. (ROMMEL SALES)