Tinamaan ng balang ligaw
BABAE SUGATAN

SUGATAN ang isang babae matapos tamaan ng ligaw na bala nitong bisperas ng Bagong Taon, Sabado, 31 Disyembre, sa lungsod ng Iloilo.

Kinilala ng pulisya ang biktimang si Kate Cambronero, 20 anyos, residente sa Brgy. Rizal, La Paz District, sa naturang lungsod.

Agad nadala si Cambronero sa pagamutan matapos tamaan ng ligaw na bala ang kanyang kaliwang binti habang nasa higaan pasado 9:00 pm.

Tinutukoy pa ng La Paz Police Station ng Iloilo CPO ang uri ng baril na ginamit sa pagpapaputok at kung kanino ito nakapangalan.

Narekober ng pulisya ang mga basyo ng bala mula sa dalawang kalapit na bahay.