HATAW! D'yaryo ng Bayan hatawtabloid.com
HATAWAN
ni Ed de Leon
TIYAK iyon, wala man siyang sinasabi sa ngayon, masakit din para kay Nora Aunor iyong sinabi ni Matet na ayaw na niyang makausap ang nanay-nanayan niya. Hindi mo rin naman masisisi si Matet, dahil maraming mga marites na nakialam sa problema nila, na kung iisipin mo sa pamilya lang nila. Pero nakialam nga ang mga basher, na kinilala ni Matet na mga Noranian, na sinirasiraan siya at halos murahin siya sa social media.
Ano ang hinahanap ni Matet? Siguro nga ang naisip niya, kung itinuturing siyang tunay na anak, bakit hindi naawat ng nanay-nanayan niya ang fans na nambabastos sa kanya, at sa halip ay nanatiling walang kibo, na para bang sinasabi na ok lang sa kanya ang ginagawa ng kanyang fans?
Nauna nga si Matet na naglabas ng sama ng loob. Pero hindi mo siya masisi, dahil maaapektuhan ang kabuhayan ng kanyang pamilya sa ginawa ng nanay-nanayan niya. Pero sinabi naman ni Matet, hindi siguro si Nora iyon kundi iyong isang malapit sa kanya, na hindi rin naman tinukoy noong bata kung sino. Pagkatapos niyon, akala mo may nagkukumpas talaga para sabay-sabay na i-bash si Matet, pero masisira ba ang kredibilidad noong bata eh kung sino-sino lang naman ang mga basher na iyon. Iba siguro kung si Nora ang magsasalita mismo, pero kung iyong trolls lang, wala iyon.
Iyon naman siguro ang hinihintay ni Matet, iyong mismong ang nanay-nanayan niya ang magsabi kung bakit nangyari ang problema.
Kaso marami pa ang pumapel, kabilang na ang isa pang ampon ni Nora na nagsabi kay Matet na tumigil na sa kanyang negosyo at maging reseller na lang ng produkto ng nanay niya, na maski anong tingin naman ang gawin mo ay hindi tamang katuwiran.
Ewan kung paano matatapos iyang kaguluhan nilang iyan. Pero naniniwala kami na matatapos lang iyan kung mapapatigil ni Nora ang kanyang mga troll sa paninira kay Matet at kausapin niya ang anak-anakan. Sinabi man ni Matet na ayaw na siyang makausap, pero kung nariyan na siya hindi naman siya magagawang talikuran na lamang niyon.
Doon lang maaayos iyan.
