Bombay binoga ng ‘rider’

MALUBHANG nasugatan ang isang Indian national sa dalawang beses na pamamaril ng hindi kilalang suspek, sakay ng isang motorsiklo sa Navotas City, kahapon ng umaga.

Patuloy na inoobserbahan sa Tondo Medical Center sanhi ng tama ng bala sa katawan ang biktima na kinilalang si Kumar Sandeer, 35 anyos, residente sa Diam St., Gen T. De Leon, Valenzuela City.

Ipinag-utos ni Navotas City police chief P/Col. Dexter Ollaging sa kanyang mga tauhan ang follow-up investigation para sa posibleng pagkakakilanlan at pagkakaaresto sa suspek.

Sa pahayag ng saksing si John Andrei Arag, 35 anyos, pedicab driver kina Navotas police investigators P/SSgt. Reysie Peñaranda at P/Cpl. Billy Godfrey Aparicio, sakay siya sa kanyang pedicab habang nasa kanyang unahan ang dalawang motorsiklo sa stop light sa Lapu-Lapu Ave., corner Dalagang Bukid St., Navotas City dakong 9:50 am.

Nakita ng saksi na biglang bumunot ng hindi matukoy na uri ng baril ang suspek at dalawang ulit na pinaputukan ang biktimang bumagsak mula sa kanyang motorsiklo.

Sa kabila ng tama ng bala, nagawang makatayo ng biktima at agad sumakay sa kanyang motorsiklo saka minaneho patungong C4 Road at isinugod ang kanyang sarili sa nasabing pagamutan habang mabilis na tumakas ang suspek patungong C3 Road. (ROMMEL SALES)