HATAW! D'yaryo ng Bayan hatawtabloid.com
NA-TRAP ang isang 22-anyos babae habang dalawa ang sugatan matapos gumuho ang isang 4-storey residential building sa Malabon City, kahapon ng umaga.
Ayon kay Malabon police chief P/Col. Amante Daro, si Ronalyn Tumbokon ay na-rescue dakong 11:25 am nang ma-trap ng higit apat na oras sa gumuhong residential building sa Orchids St., Brgy. Longos, dakong 7:00 am.
Kinilala ang dalawa pang sugatan na sina Rhodora Tumbukon at Francisco Catindoy, unang na-rescue ng mga tauhan ng Malabon Disaster Risk Reduction Management Office (MDDRMO) at Malabon Bureau of Fire Protection (BFP).
Naka-confine ang mga biktima sa Ospital ng Malabon.
Sa tinanggap na report ni Col. Daro, ang bahay kung saan nakatira ang mga biktima ay nadamay nang gumuho ang estrukturang katabi ng kanilang bahay.
Ang mga pamilyang nakatira sa gumuhong residential building ay binubuo ng lima katao mula sa Esilio family at apat mula sa Morada family, pinalad na hindi masaktan nang makatakas bago gumuho ang estruktura.
Pinayohan ng pamahalaang lungsod ng Malabon ang mga residenteng nakatira malapit sa gumuhong gusali na pansamantalang iwanan ang kanilang mga bahay hanggang matapos ang imbestigasyon at assessment na isinasagawa ng Malabon BFP at City Engineering Office.
Patuloy ang imbestigasyon sa nasabing insidente ngunit naniniwala ang mga awtoridad na mahinang pundasyon ng gusali ang posibleng dahilan ng pagguho. (ROMMEL SALES)
