Motorcyle driver, todas sa umaatras na trailer truck

ISANG driver ng motorsiklo ang namatay nang mahagip ng puwitan ng isang dambuhalang trailer truck at pumailalim hanggang maipit ng gulong sa Navotas City kamakalawa ng gabi.

Dead on-the-spot ang biktimang kinilalang si Jade Matthew Diez, 28 anyos, residente sa Brgy. North Bay Boulevard South (NBBS) – Proper sa naturang lungsod, sanhi ng pagkadurog ng katawan.

Mahigit isang oras bago nakuha sa ilalim ng truck ang nadurog na katawan ng biktima.

Kaagad naaresto ang suspek na kinilalang si Rafael Vitug, 40 anyos, residente sa Velasquez St., Tondo, Maynila.

Batay sa  imbestigasyon ni P/Cpl. Florencio Nalus, dakong 8:45 pm, nang maganap ang insidente sa kahabaan ng C-3 Road, Brgy. NBBS ng nasabing lungsod.

Tinatahak ng biktima, sakay ng kanyang motorsiklong nakarehistro sa isang Juan Paolo Enriquez ang kahabaan ng C-3 Road patungong Caloocan City.

Tiyempong minamaniobra ni Vitug ang trailer truck papasok sa garahe sa tapat ng isang gasoline station sa C-3 Road, Brgy. NBBS – Proper pero dahil walang spotter nahagip ng kaliwang bahagi ng truck ang motorsiklong minamaneho ng biktimang si Diez.

Bigla itong bumangga sa truck na nagresulta upang tumalsik at mapailalim siya sa mga gulong ng dambuhalang sasakyan.

Nadakip ng mga nagrespondeng tauhan ng Navotas police ang driver ng trailer truck na ngayon ay nahaharap sa kasong reckless imprudence resulting in homicide habang iniutos ni Navotas police chief P/Col. Dexter Ollaging ang pagpapa-impound sa tractor head at nawasak na motorsiklo. (ROMMEL SALES)