Galing ni Catherine napansin agad abroad

RATED R
ni Rommel Gonzales

NAGSISIMULA pa lamang gumawa ng pangalan bilang isang international actress ang Filipinang si Catherine Macasinag Yogi ay may awards na agad siyang tinanggap abroad.

Una na rito ang pagwawagi niya sa Japan bilang Mrs. Tourism World Philippines Japan 2021.

Nito namang September 2022 ay ginawaran si Catherine ng Achievement Award sa International Film Festival sa Bangkok,Thailand para sa pelikulang Korona dahil sa kanyang magandang pagganap bilang lead female star. Kapwa ginawaran sina Catherine at ang male lead at direktor ng pelikula na si Mike Magat ng Certification of Appreciation sa naturang awards night.

Nitong October 13 naman ay tumanggap si Catherine ng parangal bilang Honorable Mention sa International Film Festival Manhattan 2022 para rin sa pelikulang Korona. Pareho rin sila ni Mike na ginawaran ng parangal sa gabing iyon sa New York City sa Amerika.

Magkapareha rin sina Catherine at Mike sa pelikulang 7 Days na mula sa TASK Entertainment Productions(producer ng Korona) na malapit na ring ipalabas sa iba’t ibang bansa sa susunod na taon.

“Masaya po ako na mapasama sa mga pelikulang ginagawa ni direk Mike Magat sa ibang bansa,” wika ni Catherine.

Si Mike ang tumatayong manager ni Catherine.