Dahil sa matinding selos
65-ANYOS LIVE-IN PARTNER SINAKSAK SA HARAP NG 2 ANAK

PATAY ang isang 65-anyos babae nang saksakin ng kanyang kinakasama dahil sa matinding pagseselos sa harap ng kanilang dalawang anak sa bayan ng Isabela, lalawigan ng Negros Occidental nitong Lunes, 17 Oktubre.

Kinilala ang biktimang si Digna Bordago, 65 anyos, residente sa Sitio Kalubihan, Brgy. Camang-Camang, sa nabanggit na bayan.

Ayon kay P/Capt. Joseph Partidas, hepe ng Isabela MPS, umalis ng kanilang bahay ang biktima kasama ang dalawang anak na babae at lalaki upang magtanggal ng damo sa taniman ng tubo.

Lingid sa kaalaman ng biktima, sinundan sila ng kanyang kinakasamang kinilalang si Fredo Camacho saka siya biglang sinaksak sa dibdib.

Agad namatay ang biktima habang dagling tumakas ang suspek at iniwan ang dalawang bata sa pinangyarihan ng krimen.

Ayon sa kanilang mga kaanak, hindi nag-aaway ang dalawa ngunit isang beses na nag-alaga ng kanyang apo si Bordago sa bahay ng kanyang anak ay nagalit si Camacho.

Pinaniniwalaang nagseselos si Camacho sa asawa ng kanilang anak na babae.

Patuloy na tinutugis ng mga awtoridad si Partidas upang papanagutin sa ginawang krimen.