HATAW! D'yaryo ng Bayan hatawtabloid.com
SUMAMPA sa 22,794 katao o nasa kabuuang 6,731 pamilya ang inilikas sa probinsiya ng Cagayan dahil sa malawakang pagbaha bunsod ng hagupit ni bagyong Neneng.
Ayon kay Cagayan PDRRMO Chief Ruelie Rapsing, nasa 17 munispalidad at 86 barangays ang apektado ng pagbaha.
Kabilang sa mga bayang lubog sa baha ang Ballesteros, Lal-lo, Camalaniugan, Aparri, Buguey, Santa Ana, Lasam, Baggao, Santa Teresita, Gattaran, Santa Praxedes, Claveria, Sanchez Mira, Gonzaga, Abulug, Allacapan, at Calayan.
Dahil sa patuloy na pagtaas ng tubig, walang tigil ang ginagawang force evacuation ng mga awtoridad.
Ani Rapsing, may mga tulay at mga daan ang hindi pa rin passable hanggang sa ngayon partikular sa bayan ng Rizal, Sta. Teresita, Baggao, Buguey, Santa Ana, Claveria at Allacapan.
Dagdag niya, walang naitalang casualties matapos manalasa ang bagyong Neneng maliban sa isang 34-anyos lalaki na sumemplang habang nakasakay sa bisikleta dahil sa madulas na daan.
Tiniyak ni Rapsing na sapat ang mga pagkain na ipinamamahagi ng LGUs sa mga bakwit.
