Hamong suntukan inayawan  
SIGA NANAKSAK TIKLO

INARESTO ng mga awtoridad ang isang lalaking nagtitigas-tigasan sa kanilang lugar matapos saksakin ang isang kabarangay at manlaban sa mga tanod sa bayan ng Marilao, lalawigan ng Bulacan, nitong Lunes, 10 Oktubre.

Sa ulat na ipinadala kay P/Col. Relly Arnedo, OIC ng Bulacan PPO, kinilala ang arestadong suspek na si Joselito De Dios, residente sa Brgy. Abangan Sur, sa nabanggit na bayan.

Una rito, hinamon ng suntukan ni De Dios ang isang kabarangay ngunit hindi siya pinatulan at sa halip ay umiwas sa gulo.

Nang hindi pinatulan ang paghahamon ng suntukan ni De Dios, inundayan niya ng saksak ang biktima na kanyang ikinasugat kaya humingi ang ilang residente ng tulong sa mga barangay tanod.

Gayonman, maging ang mga nagrespondeng barangay tanod ay pinagtangkaang saksakin ng suspek at umamo lamang nang dumating ang mga pulis na dumakip sa kanya.

Nakakulong ang suspek sa Marilao MPS custodial facility habang inihahanda ang pagsasampa sa korte ng mga kasong Attempted Homicide at Direct Assault. (MICKA BAUTISTA)