HATAW! D'yaryo ng Bayan hatawtabloid.com
ALAM MO NA!
ni Nonie Nicasio
SIGURADONG madadagdagan pa ang dalawang acting trophy ni Sean de Guzman para sa pelikulang Fall Guy. Ibang klase kasi ang ipinakita niyang husay ng performance rito, ibang Sean de Guzman ang mapapanood sa pelikulang ito ng award-winning director na si Joel Lamangan.
Napanood namin ang private screening nito at talagang markado ang role ni Sean bilang biktima ng injustice ng mga taong mayayaman at makapangyarihan.
So far, dalawang Best Actor na ang napanalunan ni Sean sa international filmfest para sa Fall Guy. Ito’y sa sa CHITHIRAM International Film Festival sa India, na sinundan ng Anatolian Film Awards sa Turkey.
Next month ay sa Barcelona Filmfest naman pupunta mismo si Sean, kasama ang manager niyang si Ms. Len Carrillo para sa naturang pelikula. At tiyak na sa mga award giving bodies sa bansa ay mapapansin ang kakaibang husay dito ni Sean. Kaya malamang na madadagdagan pa ang acting trophy ni Sean para sa pelikulang Fall Guy.
Ipinahayag ni Sean ang sobrang kagalakan sa dalawang acting award sa international filmfest pa na nakopo niya, so far.
Sambit ni Sean, “Siyempre po nakakagulat talaga, dahil wala akong ine-expect na award, tapos ay international filmfest pa, hindi ba? Sobrang nakakataba ng puso, kasi ay may nakakapansin na kumbaga, ng talent (natin).”
Nabanggt din ng guwapitong aktor na wish niyang kilalanina din sa sariling bansa. “Wish ko po ay ma-recognize rin ako rito sa Filipinas, kasi iba pa rin yung mga nakakapanood dito sa Filipinas na mas ma-appreciate nila ito. Iba yung pakiramdam kasi rito kapag pinanaood nila yung pelikula.”
Mula sa 3:16 Media Network at Mentorque Productions, kabilang sa cast ng Fall Guy sina Shamaine Buencamino, Glydel Mercado, Tina Paner, Jim Pebanco, Vance Larena, Cloe Barreto, Marco Gomez, Quinn Carrillo, Karl Aquino, Pancho Carrillo, Mark Cardona, Tiffany Grey, Azekah Alvarez, Nisa Ortiz, Hershie de Leon, at Itan Rosales.
