Polo sobrang naiyak nang tamaan ng Covid ang buong pamilya

MA at PA
ni Rommel Placente

NOONG June 27 ay 40th birthday ni Polo Ravales. Supposedly, magkakaroon siya ng small celebration. Pero hindi niya na nagawang ipagdiwang dahil tinamaan siya, ang kanyang asawang si Paulyn Quiza, at ang baby nila na si Yatrick Paul ng COVID 19.

Kuwento ni Polo, “Nagkaroon na kami ng COVID dati pati siya (Paulyn), pati ‘yung baby namin tinamaan. Birthday ko pa last June. Mayroon dapat akong parang small celebration for my 40th birthday.  Naka-prepare na s’ya, nakahanda na lahat, tinamaan kami ng June 24, nagka-symptoms kami pati ‘yung baby. Kaya hindi natuloy plus nakita ko hindi omicron ‘yung tumama sa amin medyo malakas eh.

“Hinihingal kami. Good thing malakas ‘yung baby.”

Pero nilagnat ang kanilang baby ng two days. Kaya naiyak si Polo sa awa sa kanilang panganay. 

“So talagang naiiyak ako noon sabi ko, ‘My God ganito pala ‘yung feeling’. Hindi ko alam bakit ‘yung ibang tao minamaliit nila ‘yung Covid. Sa amin hindi omicron eh so, talagang ang tindi. So sabi namin ‘yung night out wala muna not unless importanteng -importante.”

Nagpapasalamat si Polo sa Nasa Itaas na okey na siya ngayon at ang kanyang mag-ina.