HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
KASADO na ang pelikulang magpapakita ng husay sa pag-arte ng mga sumabak sa reality show na SocMed House: Bahay ni Direk Miah (Jeremiah Palma, direktor), isa sa proyekto ng Kapisanan ng mga Social Media Broadcasters sa Pilipinas (KSMBPI) Film Division. Ito ang inihayag ni Dr Michael Aragon, founding chairman ng KSMBPI sa lingguhang Showbiz Kapihan sa Max’s Restaurant.
Ani Doc Aragon, “Silang 40 housemates ay kasama sa movie. Ang mga role nila ay base sa kanilang magiging ranking sa show which will be based via online voting.
“‘Yung pinakamataas na score ang magiging bida,” sambit ni Doc Michael.
Isang horror film ang gagawin ng mga ito na ang tentative title ay Ang Seksing Multo sa SocMed House.
Napapanood ang reality show na SocMed House: Bahay ni Direk Miah sa Facebook page ng KSMBPI at sa KRTV Youtube Channel. Dito’y 10 housemates ang inilalagak lingo-lingo na sumasailalim sa training, workshop, at iba pang pagsubok na hahasa sa kanilang husay sa pag-arte.
Sinabi pa ni Doc Michael na de kalidad ang pelikulang gagawin nila para sa mga socmed housemates na maipagmamalaki hindi lang sa ‘Pinas kundi maging sa international market.
“We would like to let the world know that Filipino filmmakers are way, way capable and can deliver. Pinag-aralan talaga namin ito nang husto and every now and then ay may changes kaming ginagawa sa pelikula para mas mapaganda pa,” paliwanag pa ng founding chairman ng KSMBPI.
Target ng KSMBPI na makagawa ng pelikula buwan-buwan. Ang unang pelikulang nagawa nila, ang Umbra na idinirehe ni Jeremiah ay nanalo ng dalawang international awards. Ito’y ang Best Director sa Roshani International Film Festival at sa Venus International Film Festival sa India.
