HATAW! D'yaryo ng Bayan hatawtabloid.com
NADAKIP ang isang lalaking hinihinalang notoryus na tulak ng ilegal na droga at nasa Philippine Drug Enforcement Agency (PDEA) watchlist sa isinagawang buybust operation sa bayan ng San Ildefonso, lalawigan ng Bulacan, nitong Linggo, 4 Setyembre.
Kinilala ang suspek na si Jose Oliber Marcelo, 56 anyos, isang karpintero at residente ng Brgy. Malipampang, sa naturang bayan, na inaresto sa mga operatiba ng San Ildefonso MPS at SOU, PNPDEG sa ilalim ng pamumuno ni P/Lt. Col. Heryl Bruno at sa pakikipagkoordinasyon sa PDEA.
Sa inisyal na imbestigasyon, dinakip ang suspek matapos bentahan ng selyadong sachet ng hinihinalang shabu na may timbang na 0.8 gramo ang pulis kapalit ng isang pirasong P500 bill na marked money.
Nakumpiska mula sa suspek ang isa pang piraso ng selyadong sachet ng hinihinalang shabu may timbang na 0.9 gramo.
Dinala ang mga narekober na ebidensiya sa Bulacan Provincial Crime Laboratory Office-Forensic Unit para sa Laboratory Examination samantalang ang suspek ay isasailalim sa drug test examination. (MICKA BAUTISTA)
