Mister pinagsasaksak ng katagay, patay

TIGOK ang isang 57-anyos lalaki nang pagsasaksakin ng kainuman makaraan ang kanilang mainitang pagtatalo sa Navotas City, kamakalawa ng gabi.

Hindi umabot nang buhay sa Navotas City Hospital sanhi ng mga saksak sa katawan ang biktimang si Melvin Gariando, residente sa Oliveros dike, Brgy., Tangos North ng lungsod.

Nakapiit habang nahaharap sa kaukulang kaso ang suspek na kinilalang si Rogelio Jimenez, 60, ng F. Cruz, Brgy., Tangos North ng lungsod.

Sa report ni P/SSgt. Karl Benzon Dela Cruz kay Navotas police chief, Col. Dexter Ollaging, 7:45 pm nang maganap ang insidente sa Badeo 5, Oliveros Dike, Tangos North.

Lumabas sa imbestigasyon, nag-iinuman ang biktima at ang suspek sa naturang lugar nang mauwi sa pagtatalo.

Sa kainitan ng pagtatalo, biglang naglabas ng patalim si Jimenez at inundayan ng saksak sa katawan si Gariando saka mabilis na tumakas habang isinugod ang biktima sa pagamutan ngunit idineklarang dead on arrival.

          Isang alyas Jonas, nakasaksi sa insidente ang nag-ulat sa mga duty tanod ng Brgy. San Roque, para humingi ng tulong sa mga tauhan ng Intelligence Section ng Navotas police na agad nagsagawa ng follow-up operation kaya mabilis na naaresto ang suspek. (ROMMEL SALES)