Sa Malabon  
3 TULAK HOYO SA BUY BUST 

HOYO ang kinalalagyan ng tatlong hinihinalang drug personalities matapos maaresto sa isinagawang buy  bust operation ng pulisya sa Malabon City, kahapon ng madaling araw.

Kinilala ni Malabon City police chief, Col. Albert Barot ang mga naarestong suspek na sina Rolando Cruz, alyas Olan, 46 anyos, bike assembler; Norlito Lopez, alyas Ohle, 56 anyos, kapwa residente sa Brgy., Ibaba; at Jerry Camposano alyas Kuya, 46 anyos, residente sa Brgy., 8, Caloocan City.

Ayon kay Col. Barot, dakong 4:00 am nang magsagawa ang mga operatiba ng Station Drug Enforcement Unit (SDEU) sa ilalim ng pangangasiwa ni P/Lt. Alexander Dela Cruz ng buy bust operation sa Herrera Alley, Brgy. Ibaba, ng nasabing lungsod, kung saan nakipagtransaksiyon ang isang undercover police kay Camposano ng P500 halaga ng droga.

Kaagad dinamba ng mga operatiba si Camposano at Cruz, na kanyang kasabwat, matapos tanggapin ang marked money mula sa police poseur-buyer kapalit ng isang plastic sachet ng shabu.

Ayon kay P/MSgt. Randy Billedo, kasamang inaresto ng mga operatiba si Lopez matapos makuhaan ng hinihinalang shabu na umaabot sa 7.8 gramo, tinatayang may standard drug price P53,040 ang nakuha sa mga suspek, kasama ang buy bust money.

Nahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)