HATAW! D'yaryo ng Bayan hatawtabloid.com
DALAWANG tulak at dalawa sa kanilang kliyente ang nadakip nang makuhaan ng mahigit P.7 milyong halaga ng shabu sa isinagawang buy bust operation ng pulisya sa Valenzuela City, kahapon ng madaling araw.
Kinilala ni P/Lt. Doddie Aguirre, hepe ng Station Drug Enforcement Unit (SDEU) ng Valenzuela City police ang mga naarestong suspek na sina Morris Bacod, alyas Boss, 18 anyos, at si Geoffrey Cardinez Jr., 19 anyos, kapwa pusher; at sina Enrico Rosales Jr., 24 anyos, at Erwin Manuel, 34 anyos, kapwa user, parehong residente sa Caloocan City.
Sa report ni Valenzuela police chief Col. Salvador Destura Jr., kay Northern Police District (NPD) Acting Director P/Col. Ponce Peñones Jr., dakong 12:00 am nang magsagawa ang mga operatiba ng SDEU sa pangunguna ni P/Lt. Aguirre ng buy bust operation sa Gen. T. De Leon Market, Brgy. Gen. T. De Leon.
Kaagad inaresto ng mga operatiba si Bacod at Cardinez nang bentahan ng P32,000 halaga ng droga ang isang pulis na umakto bilang poseur buyer, kasama sina Rosales at Manuel na kapwa nakuhaan ng tig-isang plastic sachet ng hinihinalang shabu.
Ayon kay P/Cpl. Glenn De Chavez, nakompiska sa mga suspek ang halos 110 gramo ng hinihinalang shabu, may standard drug price na P748,000, buy bust money na isang tunay na P1,000 bill, 15 pirasong P1,000 boodle money, at 32 pirasong P500 boodle money, P850 cash, 3 cellphones, at itim na belt bag.
Kaugnay nito, pinuri ni Col. Peñones ang Valenzuela City police sa ilalim ng pamumuno ni Col. Destura sa matagumpay na drug operation habang sasampahan ng kasong paglabag sa Section 5, 26, at 11 sa ilalim ng Article of RA 9165 at Art 151 of RPC ang mga naarestong suspek sa Valenzuela City Prosecutor’s Office. (ROMMEL SALES)
