HATAW! D'yaryo ng Bayan hatawtabloid.com
MAGAKAKASUNOD ang mga insidente ng nakawan sangkot ang mga riding-in-tandem sa lalawigan ng Bulacan kung saan unang iniulat na biglaang tinangay ng isang lalaki ang mga cellphone ng dalawang babaeng empleyado ng isang kainan sa bayan ng Pandi, Bulacan.
Ayon sa pahayag ng isa sa mga biktima na kinilalang si Rechelle Gonje nitong Martes, 9 Agosto, habang sila ay nanonood sa kani-kaniyang cellphone, may biglang pumasok na lalaki at walang sabi-sabing biglang hinablot ang kanilang mga gadget.
Matapos makuha ang cellphone ng dalawang biktima, mabilis na tumakbo ang lalaki at umangkas sa isang motorsiklo saka tumakas.
Ayon sa mga biktima, hindi nila namukhaan ang suspek dahil bukod sa may hood ang suot na jacket ay nakatakip pa ang mukha nito.
Naiulat na ang insidente sa tanggapan ng Pandi MPS na patuloy na nagsasagawa ng imbestigasyon.
Kasunod nito, kahapon ng umaga, sa Brgy. Guyong, sa Sta.Maria, nabiktima ang isa pang babae ng riding-in-tandem kung saan nakuha sa kanya ang perang nagkakahalaga ng P2,609.
Nabatid na mag-isang naglalakad ang biktima nang lapitan ng riding-in-tandem at sapilitang kinuha mula sa kanya ang bag na naglalama ng pera.
Kaugnay nito, nananawagan ang ilang konsernadong mamamayan na higpitan ng kapulisan ang pagmamatyag sa mga gumagalang riding-in-tandem na ang pakay ay magnakaw. (MICKA BAUTISTA)
