Eleksiyon sa barangay at SK iliban – Hataman

DAHIL SA PANDEMYA, nagmungkahi si Basilan Rep. Mujiv Hataman na ipagpaliban muna ang eleksiyon sa barangay at sa Sangguniang Kabataan.

Ayon kay Hataman, mas mainam na iraos ito sa Mayo 2024 imbes sa 5 Disyembre.

“Nasa gitna pa rin tayo ng rumaragasang pandemya, hindi pa balik normal ang lahat. Hindi natin sigurado kung ano ang kalagayan ilang buwan mula ngayon. Kaya ang aking panukala, ipagpaliban muna ito,” anang dating gobernador ng binuwag na Autonomous Region in Muslim Mindanao.

“At nakita naman natin, nitong nakaraang halalan, napakamahal ng gastos kaugnay sa preparasyon at aktuwal na botohan sa ating pagnanais na maging ligtas ang lahat ng nais na bumoto. Mas makabubuti kung makatitipid tayo ngayong taon at magamit pa sa ibang bagay ang pondong nakalaan sa halalan,” dagdag niya.

Inihain ni Hataman ang House Bill No. 3384 na naglalayong amyendahan ang Republic Act 9164 upang ipagpaliban ang eleksiyon sa barangay at SK mula 5 Disyembre 2022 tungo sa pangalawang Lunes ng Mayo 2024.

Ani Hataman, higit 80 bansa ang nagdesisyon na ipagpaliban ang mga kanilang eleksiyon dahil sa CoVid-19.

Aniya, magiging pinakamahal ang pagdaraos ng eleksiyon ngayon dahil sa CoVid-19.

“More than P1 billion was allocated for the purchase of items labeled as ‘COVID-19 supplies’ face masks, alcohol, plastic acetates, and antigen tests for election officers who attended training,” ani Hataman.

“With the passage of the bill, the government is expected to generate savings of approximately P8 billion – a significant amount for a cash-strapped government. This representation believes that the budget could be realigned for economic stimulus and CoVid-19 response programs for the benefit of the entire nation,” aniya. (GERRY BALDO)