HATAW! D'yaryo ng Bayan hatawtabloid.com
ISANG 63-anyos magsasaka ang napaslang habang sugatan ang dalawang iba pa sa insidente ng pamamaril nitong Lunes, 1 Agosto, sa bayan ng San Andres, sa lalawigan ng Quezon.
Sa ulat ng Quezon PPO, agad namatay ang biktimang kinilalang si Bernabe Ebarsabal nang pagbabarilin ng hindi kilalang suspek habang nakaupo sa veranda ng kanilang bahay sa Brgy. Pansoy dakong 7:00 pm kamakalawa.
Matapos ang insidente, nagtungo ang tatlong lalaking armado ng mga baril sa isang kubo, 15 metro ang layo mula sa bahay ni Ebarsabal, saka binaril si Don Don Argawanon, 34 anyos, at Jurnel Nick Riveral, 55 anyos.
Nakaligtas ang dalawang biktima na dinala sa pampublikong pagamutan sa kalapit na bayan ng San Francisco.
Ayon kay P/SSgt. Aikee Genton, imbestigador ng kaso, pangkaraniwang mga magsasaka lang ang mga biktima at walang anomang record sa kanilang talaan.
Patuloy ang ginagawang imbestigasyon ng mga awtoridad upang matukoy ang mga suspek at ang motibo sa pamamaslang.
