Pokwang payag maisama ang kanilang anak ni Lee sa Amerika

MA at PA
ni Rommel Placente

SA podcast ng Updated with Nelson Canlas, tinanong si Pokwang kung posible bang magkabalikan o magkaroon pa ng second chance ang love story nila ng American actor na si Lee O’Brian, ang sagot niya ay wala na.

“Hindi, wala eh, walang ganoon. Basta okay na, okay, okay! Bye!” sabi ni Pokwang.

Inamin naman ng komedyana na sinubukan din nilang ayusin ni Lee ang kanilang mga problema pero hindi na talaga umubra.

Nag-usap din sila nang masinsinan para sa co-parenting agreement nila sa anak nilang si Malia. Nagkasundo sila na magkita tuwing weekend para sa anak.

“Parang mas ano, ‘oh darating ang Dada mo’ tapos mag-uusap kami, saan kakain, ganoon. Unlike noong nandito, kaunting ano, init ng ulo. Ganoon talaga,” ani Pokwang.

Umaasa si Pokwang na magiging maayos ang lahat sa kanila ni Lee para na rin sa kapakanan ni Malia.

“Ang pinakamabuti roon talaga… hindi masakit, wala kaming pait-paitan sa isa’t isa,” sabi pa niya.

Payag din ang komedyana na isama ni Lee ang kanilang anak sa Amerika para makita at makasama ng bata ang lolo’t lola nito roon.