HATAW! D'yaryo ng Bayan hatawtabloid.com
ni GERRY BALDO
NANAWAGAN si Deputy Speaker Rufus Rodriguez sa pamahalaang Marcos na huwag isama ang Tsina sa malalaking proyekto ng gobyerno dahil may iba namang magpopondo rito.
Ayon kay Rodriguez, maaaring huwag ituloy ang tatlong malaking proyektong popondohan ng Tsina na nilagdaan noong nakaraang administrasyong Duterte.
“The old saying ‘beggars cannot be choosers’ cannot apply to us in this case and other projects. We have other funding options, which the new national leadership should explore,” ayon sa kongresista ng ikalawang distrito ng Cagayan de Oro City.
Aniya may ibang opsiyon naman ang bansa kagaya ng World Bank at Asian Development Bank, o ang US AID, JICA ng Japan, Korean Agency at EU Fund, para pagkunan ng pondo sa mga proyektong ito.
Ayon kay Rodriguez may kaakibat na problema ang pag-utang sa Tsina.
“The problem with loans from China is that there will be strings attached which will sacrifice our full sovereign rights over our West Philippine Sea,” ani Rodriguez.
Ikinalungkot ni Rodriguez ang pagkaudlot ng unang tren sa Mindanao dahil hindi inaprobahan ng Tsina.
“Sad especially for Mindanao, the home region of our former president. Our island deserves its first railway system,” anang mambabatas.
Aniya, hindi talaga maaasahan ang Tsina.
Ang mga naudlot ng proyekto ay ang Philippine National Railways – Bicol line, na magmumula sa Calamba, Laguna hangang Daraga, Albay, nagkakahalaga ng P142 bilyon; ang 71-kilometrong magdurugtong sa Clark Freeport Zone sa Angeles City at Subic Freeport; at ang unang hakbang ng Mindanao railway na may habang 102 kilometro, nagkakahalaga ng P83 bilyones.
Aniya, maaring kausapin ni Pangulong FM Jr., ang international financial institutions at mga lokal na negosyante upang pondohan ang mga proyektong ito.
“We can request RSA (Ramon Ang of San Miguel Corp.), MVP (Manny Pangilinan of PLDT group), Enrique Razon (ICTSI) and Sabin Aboitiz (Aboitiz Group) to consider financing the Mindanao railway,” aniya. Maaari rin ang gobyerno na ang magpondo sa mga proyektong ito.
