Pag-upo ni Marcos, Jr., sa Palasyo
250 KATAO NAWALAN NG TRABAHO SA PCOO

ni ROSE NOVENARIO

ISA sa pangunahing problema ng bansa ang unemployment o kawalan ng trabaho kaya maraming Pinoy ang naghihirap.

Ngunit ang bagong administrasyon na iniluklok ng 31 milyong boto sa katatapos na 2022 presidential elections, unang tinanggalan ng trabaho ang mga pangkaraniwang manggagawa sa gobyerno.

Batay sa Department Order No. 22-04 na inilabas ni Press Secretary Trixie Cruz-Angeles, iginiit niya ang mahigpit na pagtalima sa Memorandum Circular No. 1 ni Executive Secretary Vic Rodriguez na nagdedeklarang bakantehin ang ilang posisyon sa mga departamento at kawanihan sa pamahalaan.

Apektado ng naturang direktiba, hindi lamang lahat ng presidential appointees, non-career executive service officials na may Career Executive Service positions, kundi maging lahat ng “contractual and/or casual employees.”

Nabatid, may 250 ang contractual/casual employees ang nawalan ng trabaho sa PCOO sanhi ng Department Order ni Angeles alinsunod sa MC No. 1 ni Rodriguez.

Nangangamba ang mga kawani ng mga departamento at kawanihan ng gobyerno na maapektohan ang kanilang suweldo kapag ang uupong pinuno nila’y acting capacity o officer-in-charge lamang dahil wala itong “legal personality” para pumirma sa payroll.

“The general rule kasi nga is that the OIC can sign on the day-to-day functions of an agency. So I don’t think na magkakaroon ng problema dito sa ano — sa what we call the transition period,” ayon kay Angeles.