Thea muntik iwan ang showbiz

RATED R
ni Rommel Gonzales

INILAHAD ni Thea Tolentino na nakaranas siya ng quarter life crisis noong kasagsagan ng COVID-19 pandemic kaya naman naisipan niyang magtrabaho sa corporate world. 

“Noong nag-scroll ako, kasi nitong huli, as in tinry kong mag-apply, kasi gusto ko nang [magka]experience sa corporate world,” ani Thea.

Pero hindi naman niya iiwan ang showbiz.

“Parang quarter life crisis na feeling, na parang, ‘Ito lang ‘yung alam ko? What if magkaroon ng pandemic ulit tapos na-stop ‘yung mga project?’ Work from home, ‘yung puwedeng gawin. Kasi ang hirap din mag-shoot from home at saka nahihirapan talaga mag-isip ng content,” ani Thea.

Ibinahagi rin ni Thea na nakakita siya ng mga kompanyang hiring pero hinahanapan na agad ng experience ang mga fresh graduate.

Taong 2020 pa nakapagtapos ng pag-aaral si Thea sa kolehiyo sa kursong Bachelor of Arts in Business Administration sa Trinity University of Asia. Pero dahil sa COVID-19 pandemic, sa online muna ginawa ang kanilang seremonya ng pagtatapos.

“Masarap sa pakiramdam dahil achievement siya para sa akin. Napagsabay ko ang dalawang bagay na importante sa akin. Nahirapan man ako sa schedule, pero worth it.”  

Mapapanood si Thea sa Lolong ng GMA at sa pelikulang Take Me To Banaue. Ang Fil-Am movie na Take Me To Banaue ay mula sa Carpe Diem Pictures, isang independent movie production na based sa US.