HATAW! D'yaryo ng Bayan hatawtabloid.com
PINAGSISIHAN ni outgoing President Rodrigo Duterte na pinayagan niya ang operasyon ng online sabong o talpakan kahit may ulat na may mga nawawalang sabungero.
“On e-sabong, I am sorry, I realized it late,” sabi ni Duterte sa kanyang talumpati matapos mag-inspeksiyon sa main campus ng National Academy of Sports sa New Clark City, Capas, Tarlac.
“It was at P600 million a month, billions in a year because there are a lot of operations. I am very sorry it had to happen,” dagdag niya.
Noong Marso at Abril 2022 ay ipinagtanggol nang husto ni Duterte ang talpakan bunsod ng malaking halagang iniaambag umano sa kaban ng bayan na ginagamit sa pagtugon ng pamahalaan sa CoVid-19 pandemic.
Ngunit noong Mayo 2022 ay tinuldukan niya ang operasyon ng talpakan batay sa rekomendasyon ng Department of the Interior and Local Government (DILG) dahil ito’y taliwas sa Filipino values at nakasisira ng pamilya.
Naging kontrobersiyal ang e-sabong sanhi ng pagkawala ng mahigit 30 sabungero at kahit inimbestigahan ito ng Senado, hanggang sa ngayon ay hindi pa rin tinutukoy ng mga awtoridad ang nasa likod ng pagdukot sa kanila. (ROSE NOVENARIO)
