Lola wanted sa Labrador, nadakip ng QC police

NAARESTO ng mga operatiba ng Quezon City Police District (QCPD) ang isang lola, No. 2 Municipal Level most wanted person (MWWP) sa Labrador Municipal Police Station sa bisa ng warrant of arrest, sa Binangonan, Rizal, nitong Huwebes ng umaga.

Kinilala ni Quezon City Police District (QCPD) Director, P/BGen. Remus Medina, ang nadakip na si Nora Escaño, alyas Nora Bernal, 70 anyos, residente sa Poblacion, Labrador, Pangasinan, batay sa report na isinumite ni P/Lt. Col.  Abraham Abayari, station commander ng Batasan Police Station (PS-6).

Ang suspek ay naaresto dakong 3:00 am nitong 8 Hunyo, sa Añonuevo St., Brgy. Macamot, Binangonan, Rizal sa pinagsanib na puwersa ng PS-6, Labrador Municipal Police Station, Pangasinan, at 5th MFC-RMFB Intel operatives.

               Si Escaño ay may nakabinbing warrant of arrest sa kasong Qualified Theft na inilabas ni Judge Walter Orais Junia, ng Branch 55, Regional Trial Court, First Judicial Region, Alaminos City, Pangasinan.

Ang hukumang pinagmulan ng utos ng pagdakip ay aabisohan sa pagkaaresto sa akusado. (ALMAR DANGUILAN)