Sanya at Jak mga bayarin na sa bahay ang pinag-uusapan

RATED R
ni Rommel Gonzales

BIDA-BIDA kung ilarawan ni Jak Roberto ang kapatid na si Sanya Lopez nang kumustahin ito sa kanya.

“Bida-bida minsan,” natatawang sabi ni Jak. “Kaya ko siya tinutuksong bida-bida kasi hindi nagpapatalo ‘yun kapag kami nagkukuwentuhan. ‘Hindi kuya, ganito-ganyan!’

“Tapos laging may ibinibida tungkol sa kanya,” at natawang muli si Jak. “Mga gadget  niya o kung ano ‘yung mga bagong discovery na matagal ko namang alam na, ikinukuwento pa. Kaya kapag ikinuwento sa akin, ‘Ah, bida-bida! Dati ganito lang, dati ganyan lang.’

“Inaasar ko siya ng ganoon. Pero ‘yung relationship namin sa bahay, in fairness parehas kaming naging matured na. Dati kumbaga pinag-uusapan lang namin ‘yung mga gusto namin na gadget, mga gusto naming bilhin, mga luho.

“Ngayon we’re ano na, more on koryente, tubig, groceries, mga babayarin sa bahay, mga due date, mga “Judith”, ‘yan ganoon na ‘yung usap namin.

“Kung mag-usap na rin kami kung paano namin isu-sustain ‘yung kung ano ‘yung mayroon kami ngayon, paano magiging stable, ano pa ‘yung mga dapat i-improve, ano pa ‘yung mga dapat gawin.

“So ganoon na kaming mag-usap, very ano na, adulting,” at tumawa si Jak.    

Kapwa abala sa showbiz career nila sina Jak at younger sister niyang Sanya sa GMA. Nagsimula na sa pag-ere ang Bolera nina Jak, Rayver Cruz, at Kylie Padilla samantalang patuloy na nangunguna sa ratings game ang First Lady ni Sanya at ni Gabby Concepcion.