HATAW! D'yaryo ng Bayan hatawtabloid.com
ARESTADO ang isang misis matapos matyempuhan ng pulisya dala ang warrant of arrest sa Navotas City, kamakalawa ng hapon.
Kinilala ni Navotas City police chief Col. Dexter Ollaging ang nadakip bilang si Doris Dail, 41-anyos, residente ng Block 1 Phase 1-C, Bangus St., Brgy. North Bay Boulevard South (NBBS) Kaunlaran ng nasabing lungsod.
Ayon kay Col. Ollaging, nakatanggap ang mga tauhan ng Navotas Police Warrant and Subpoena Section (WSS) ng impormasyon na nakita ang akusado sa kanilang lugar.
Bumuo ng team ang WSS, dakong 3:10 ng hapon, kasama ang Navotas Police Sub-Station 4 saka isinagawa ang joint manhunt operation na nagresulta sa pagkakaaresto sa akusado sa kanyang bahay.
Si Dail ay dinakip sa bisa ng warrant of arrest na inisyu ni Hon. Marisa M. Buenagua, Presiding Judge ng Regional Trial Court (RTC) Branch 90, Parañaque City para sa kasong paglabag sa Art. 315 (1)(B), RPC AS AMENDED BY RA 10951 or Estafa.
Ani PSSg Renato M Panganiban Jr, ang inarestong akausado ay nasa ilalim ng kustodiya ng Navotas City Police habang hinihintay ang issuance ng Commitment Order. (Rommel Sales)
