Dennis at Jen masaya sa pagdating ng bago nilang baby

HALATA mo masayang-masaya ang mag-asawang Dennis Trillo at Jennylyn Mercado habang nagse-share sila ng mga nangyari sa panganganak ng aktres noong April 25. Isipin ninyo nakalipas pa ang ilang araw bago iyon nabalita. Iyong mga movie reporter kasi ngayon hindi na kagaya noong araw na naghahabulan ng balita. Ngayon nasanay na lang sila na nakakaharap ang mga artista kung may ipinatatawag na press conference. Ewan nga ba kung bakit ganoon ang naging kalakaran. Hindi mo rin naman masisisi ang mga movie reporter, hindi gaya noong araw na ang artista ay inilalapit ng kanilang managers sa press. Ngayon nga kung minsan may mga managers pang ayaw ipakumbida ang mga writer sa mga presscon.

Iyong mga writer naman hindi na halos naghihirap maghanap ng balita. Marami naman kasing mga balasubas na diyaryo na hindi na nagbabayad ng proferssional fees, nanghihingi pa sa writers. Halos bagsak na ang entertainment pages dahil sa ganyang practice. Iba kasi iyong ang orientation ay diyaryo talaga gaya ng Hataw.

 Ngayon ang panganganak ni Jen ay masasabi nating nasa ayos talaga.

Nagpakasal silang dalawa ni Dennis bago siya nanganak, kaya walang question lehitimo ang kanilang baby girl. Siguro alam din naman nila ang problema niyong ipapanganak ang bata na hindi kasal ang mga magulang, pareho na nilang naranasan iyan. Napaghandaan na rin nila ang buhay nila. May bahay silang naipatayo, at may nursery na rin ang kanilang baby girl sa kanilang bahay, na ipinakita pa ni Jennylyn

sa isang video bago siya nanganak.

Mapapansin ninyo iyan sa mga bata. Kung sa simula pa lang, sa panganganak pa lang ay naisilang sila nang maayos, hanggang sa paglaki magiging maayos ang buhay ng taong iyan. Pero kung ang batang isisilang na may gulo na sa pamilya, bantayan mo nang mabuti iyan dahil may mga pag-aaral na ngang nagsasabi na ang mga batang ganyan ang siyang lumalabas na juvenile delinquents. Ang utak kasi ng bata, nasa sinapupunan pa ay developed na, at nag-a-absorb na ng impormasyon.

 Kaya iyang anak nina Dennis at Jennylyn, bukod sa siguradong magiging magandang babae iyan, tiyak na nasa ayos ang magiging buhay niyan.