No.1 PDID ng NPD
LIDER NG CRIMINAL GANG ARESTADO SA PANGASINAN

HINDI nakapalag nang silbihan ng warrant at arestohin ang lider ng ‘Reyes & Abaya’ criminal gang, nakalistang no. 1 sa Priority Database on Illegal Drugs (PDID) ng Northern Police District (NPD) matapos masakote sa Alaminos City, Pangasinan.

Kinilala ni P/Col. Allan Umipig, hepe ng DID-NPD ang naarestong akusado na si Jimmy Abaya, alyas JimJim, 34 anyos, residente sa Zone 4, Brgy. Bued, Alaminos City, Pangasinan.

Sa ulat, nakatanggap ng impormasyon ang pulisya tungkol sa pinagtataguan ni Abaya sa Pangasinan na naging dahilan upang bumuo ng team ang DID-IOS, NPD sa pangunguna ni P/CMSgt. Joselito Bagting.

Kasama ang mga operatiba ng Malabon Police Station Intelligence Branch (SIB) sa pamumuno ni P/Lt. Zoilo Arquillo, sa ilalim ng pangangasiwa ni P/Col. Albert Barot, agad ikinasa ang joint operation na nagresulta sa pagkakaaresto kay Abaya sa Zone 4, Brgy. Bued, Alaminos City, Pangasinan dakong 3:30 pm.

Sa ulat ni P/Lt. Arquillo, hindi na nakapalag si Abaya nang ihain sa kanya ang warrant of arrest na inisyu ni Hon. Judge Anna Michella Cruz Atanacio-Veluz ng RTC Branch 169, Malabon City para sa kasong Murder at Frustrated Murder. (ROMMEL SALES)