HATAW! D'yaryo ng Bayan hatawtabloid.com
BINITBIT sa selda ang isang lalaking supervisor, wanted sa kasong panghahalay nang madakma ng pulisya sa lungsod ng Valenzuela.
Kinilala ni Valenzuela Police Warrant and Subpoena Section (WSS) chief, P/Lt. Robin Santos ang naarestong suspek na si Julyne Juayno, 32 anyos, residente sa Barangay Canumay East.
Ayon kay P/Lt. Santos, nakatanggap sila ng impormasyon mula sa kanilang impormante na nakita si Juayno sa kanilang lugar kaya agad silang nagsagawa ng operasyon na nagresulta sa pagkakaaresto sa suspek.
Dagdag ni Santos, inaresto ang suspek batay sa warrant of arrest na inisyu ng Branch 283 ng Regional Trial Court (RTC) ng Valenzuela City noong March 10, 2022 na may piyansang P120,000.
Sa ulat ng pulisya, si Juayno, supervisor, ay inireklamo ng isang 22-anyos babae, nang siya ay gahasain sa kanilang barracks noong 6 Setyembre 2021. (ROMMEL SALES)
