HATAW! D'yaryo ng Bayan hatawtabloid.com
KINULATA nang husto ng isang babae ang isang lolang vendor ng kakanin sabay ninakaw ang perang pinagbentahan nito sa Malabon City, kamakalawa ng hapon.
Bagamat nakatakas, agad din naaresto ang suspek at kasalukuyang nasa kustodiya ni Malabon Police Sub-Station 5 commander P/Lt. Mark Xyrus Santos, na kinilalang si Jennylyn Cantuba, 29 anyos, residente sa Block 7, Lot 18, Phase 1 C, North Bay Boulevard South (NBBS), Navotas City.
Batay sa ulat ni P/SSgt. Michael Oben kay Malabon police chief Col. Albert Barot, habang nagtitinda ng kakanin sa parking lot sa Block 15, Phase 3, A3, Brgy., Longos, Malabon City ang biktimang si Filomena Yabut-Boac, 69 anyos, biyuda, residente sa Lot 59, Phase 2, Area 3, Brgy., 59, Caloocan City, biglang sumulpot ang suspek at kinulata ng gulpi ang matanda.
Bumagsak ang lolang biktima sa rami ng pinsala habang kinuha ng suspek ang P500 kinita sa pagtitinda saka mabilis na tumakas.
Humingi ng tulong ang biktima kay P/Cpl. Michael Alanic ng SS5 at sa mga tanod ng Barangay Longos na agad nagsagawa ng follow-up operations, kaya agad naaresto ang suspek.
Hindi nabanggit sa ulat kung nabawi ang pera ng biktima, sa ipiniit na suspek sa Malabon Police Station at nahaharap sa kasong pambubugbog at pagnanakaw. (ROMMEL SALES)
