Vintage bomb, nahukay sa Kankaloo

ISANG hinihinalang vintage bomb ang natagpuan sa isang excavation site sa Caloocan City.

Ayon sa ulat, dakong 4:46 pm nang madiskubre ang naturang vintage bomb sa excavation site sa loob ng Maynilad Compound sa Brgy. 35, naging dahilan upang i-report ito ni Henry Montebon, 22, Road Roller Operator sa mga tauhan ng Caloocan Police Sub-Station 1.

Kaagad nagresponde sa naturang lugar ang team ng SECU ng Caloocan police sa pangunguna P/Lt. Leo Devero Limbaga, kasama sina P/SSgt. Jeffrey Cruz at P/Cpl. Machir Lagud, kapwa EOD Technician.

Pagdating sa lugar, agad sinuri nina P/SSgt. Cruz at P/Cpl. Lagud ang kalagayan ng naturang UXO at isinagawa ang Render Safety Procedure (RSP) sa pamamagitan ng PUCA (Pick-up and Cary Away) na nagresulta sa pagkakarekober ng isang 75mm Projectile (UXO) na may fuze ngunit kinakalawang na.

Ani P/SSgt. Cruz at P/Cpl. Lagud, considering ang lagay ng nasabing UXO ay tanggal na ang protective cover mula sa orihinal nitong posisyon upang maiwasan ang fuze mechanism sakaling aksidenteng matamaan ng anumang matigas na bagay at lubha anila itong mapanganib.

Sinabi ni P/Lt. Limbaga, dinala nila ang nasabing ordnance sa SECU-Caloocan Police para sa safe keeping bago i-turnover sa RECU-NCR para sa disposal operation. (ROMMEL SALES)