HATAW! D'yaryo ng Bayan hatawtabloid.com
PATAY ang isang security guard matapos mawalan ng kontrol sa minamanehong motorsiklo at bumangga sa isang concrete barrier sa Malabon City, kamakalawa ng madaling araw.
Binawian ng buhay habang ginagamot sa MCU (Manila Central University) Hospital ang biktimang kinilalang si Cris Edgar Arabaca, 27 anyos, residente sa Manuel L. Quezon St., Barangay Hagonoy, Taguig City, sanhi ng pinsala sa ulo.
Sa ulat ni P/Cpl. Anthony Codog kay Malabon City police chief, Col. Albert Barot, dakong 12:50 am, minamaneho ng biktima ang kanyang Honda Click 125 na motorsiklo at tinatahak ang MacArthur Highway patungong Caloocan City.
Pagsapit sa isang kilalang drug store sa Brgy. Potrero, Malabon City, biglang nawalan ng kontrol ang biktima sa kanyang motorsiklo hanggang mag-crash sa konkretong barrier.
Mabilis na isinugod sa ospital ang biktima, sinabing may grabeng pinsala sa ulo, ng mga nagrespondeng tauhan ng Malabon Police Sub-Station 1 at mga barangay tanod sa naturang pagamutan ngunit binawian ng buhay habang nilalapatan ng lunas. (ROMMEL SALES)
