HATAW! D'yaryo ng Bayan hatawtabloid.com
INIULAT ni Laguna PPO Acting Provincial Director P/Col. Rogarth Campo kay CALABARZON PNP Regional Director P/BGen. Antonio Yarra ang pagkakadakip sa rank no. 8 most wanted person regional level sa pagpapatupad ng Simultaneous Anti Criminality Law Enforcement Operation (SACLEO) ng Victoria MPS, nitong Linggo ng umaga, 20 Pebrero, sa bayan ng Victoria, lalawigan ng Laguna.
Kinilala ang MWP na si John Wendel Benepayo, 26 anyos, magsasaka, residente sa Brgy. Masapang, Victoria, Laguna, na nadakip dakong 9:51 am kamakalawa sa Sitio Lobo, Brgy. San Roque, sa nabanggit na bayan, sa pangunguna ni P/Cpl. Laudemer Abang, OIC ng Victoria MPS.
Dinampot si Benepayo sa bisa ng warrant of arrest na inisyu ni Presiding Judge Mary Jean Tibo Cajandab, Regional Trial Court Branch 26 ng Sta. Cruz, Laguna, may petsang 7 Pebrero 2022, sa kasong panggagahasa na walang inirekomendang piyansa.
Kasalukuyan nang nasa custodial facility ng Victoria MPS ang akusado at aabisohan ang court of origin sa kanyang pagkakaaresto.
Pahayag ni P/Col. Campo., “Mandato natin na protektahan ang taong-bayan, ang mga nakakulong na kriminal ang pangunahing interbensiyon ng Laguna PNP para maalis ang pagkakataon ng masasamang elemento na gumawa ng krimen. Priority ko ang kaligtasan ng Lagunense.”
