HATAW! D'yaryo ng Bayan hatawtabloid.com
TATLO ang patay habang isa ang sugatan nang tambangan ang isang kotse sa Brgy. Palampas, lungsod ng San Carlos, lalawigan ng Negros Occidental, nitong Linggo ng umaga, 20 Pebrero.
Kinilala ang mga napaslang na sina Andre Fajardo, 18 anyos; Russel Bucao, 40 anyos; at Rudy De La Fuente, 51 anyos; at ang nasugatang si Renante Chui, 27 anyos, dinala sa San Carlos City Hospital.
Nabatid, sakay ang apat na biktima ng isang puting Mazda sedan nang pagbabarilin sila ng apat na hindi kilalang mga suspek lulan ng hindi pa matukoy na sasakyan.
Ani P/Lt. Col. Jesus Mesahon, Jr., hepe ng San Carlos City Police Station (CPS), patuloy ang kanilang imbestigasyon upang matukoy ang pagkakakilanlan ng mga salarin at ang motibo sa likod ng pamamaslang.
Dagdag niya, hinahanap pa nila ang mga posibleng nakasaksi sa insidente na naganap sa liblib na lugar na walang mga bahay sa paligid.
