Sa buy bust ops
6 ADIK ARESTADO SA BALA’T BOGA

INARESTO ng Quezon City Police District (QCPD) ang anim na hinihinalang adik at tulak sa buy bust operation, kahapon madaling araw.

Kinilala ni QCPD Director, P/BGen. Remus Medina ang mga nadakip na sina Jomael Abdullah, alyas Muklo, 40 anyos, Carlos Tuliao, 56, Hervin Jainga, 49, at Mario Guballo, 49, pawang residente sa Certeza Compound, Brgy. Culiat, QC; Randy Balisado, 36, ng 5th Street, Brgy. Pasong Tamo, QC, at Bolkhia Macaundas, 24, nakatira sa AFP Road, Brgy. Holy Spirit, QC.

Ayon kay Holy Spirit Police Station 14 commander P/Lt. Col. Jeffrey Bilaro, pasado 1:00 am nang isagawa ang anti-illegal drug operation sa Certeza Compound, Brgy. Culiat, QC.

Isang pulis na nagpanggap na buyer ang bumili ng shabu at nang magkaabutan ay inaresto ang mga suspek.

Nakuha mula sa anim ang 13 plastic sachet na naglalaman ng tig-15 gramo ng shabu, nagkakahalaga ng P102,000, kalibre .38, may limang bala gayondin ang buy bust money.

Nakapiit ang mga suspek na nahaharap sa kasong paglabag sa RA9165 o ang Comprehensive Dangerous Drug Act of 2002 at paglabag sa RA10591 o ang Omnibus Election Code. (ALMAR DANGUILAN)