‘Yabang’ na serbisyo, ibigay sa mga nasunugan!

Isumbong mo
kay DRAGON LADY
ni Amor Virata

ISANG trahedya ng sunog ang dinanas ng aking mga kababayan sa Cavite City na tinupok ng apoy ang napakaraming kabahayan.

Mga kawawang pamilya na apektado ang naroroon sa Ladislao Diwa Elementary School, nagpalipas ng magdamag, matapos maganap ang sunog araw ng Sabado.

Napakalakas ng hangin dahil malapit sa dagat, lumakad ang apoy sa ilang barangay na sakop.

Ngayon dapat patunayan ng mga kandidato sa nalalapit na eleksiyon ang kanilang ‘yabang’ na tutulong sa panahon ng kagipitan sa kanilang constituents.

Ngayon ninyo patunayan na meron kayong ibubuga sa serbisyo-publiko. Sa sariling bulsa kayo dumukot! Pagkain, damit at kumot ay mga pangunahing pangangailangan. Sa aking batchmates na nasunugan, lima sila, mga pamilya nila, nakikiramay po ako sa trahedyang naranasan ninyo.

CAVITE CITY ‘DI NA KILALA

Mistulang nawala na sa mapa ang Cavite City.

Noong Sabado kasagsagan ng nagaganap na sunog, sakop ang Caridad, Cavite City, inere ng isang reporter ng GMA-7 na ang sunog ay nagaganap sa Noveleta, Cavite City hindi po siyudad ang Noveleta, munisipalidad ‘yan.

Ang Cavite City ay siyudad! Sana naging resourceful ang reporter ng GMA-7, hindi basta ere nang ere sa TV.