‘Damo’ ipinadala sa courier service nabuking ng PDEA

NASAKOTE ng mga ahente ng Philippine Drug Enforcement Agency (PDEA) ang isang lalaki sa Hermosa, Bataan dahil sa pagtanggap ng marijuana kamakalawa.

Sa ulat mula sa PDEA Bataan Office, kinilala ang naaresto na si Christian Jomar, ng Barangay San Pedro, sa nabanggit na bayan.

Nabatid na nakatanggap ng impormasyon ang naturang tanggapan mula sa isang courier service company na isang package mula sa Sta. Rosa City, Laguna ang hinihinala nilang naglalaman ng droga.

Ayon kay PDEA Region 3 Director Bryan Babang, sumailalim sa physical examination ang package at nadiskubre sa loob ang isang plastic sachet na naglalaman ng 30 gramo ng tuyong dahon ng marijuana.

Sinasabing ang droga na tumitimbang ng 30 gramo ay isiniksik pa sa isang hoodie jacket.

Kasunod nito, ikinasa ng PDEA ang controlled delivery operation, na nagresulta sa pagkakaaresto kay Jomar, nahaharap ngayon sa kasong paglabag sa RA 9165 o Comprehensive Dangerous Act f 2002. (MICKA BAUTISTA)