Bryan Termulo tour guide sa Amerika Pagkanta hinahanap-hanap

MATABIL
ni John Fontanilla

MISS na ni Bryan Termulo ang local showbiz ngayong nasa Amerika siya at doon naninirahan at nagtatrabaho.

Nakabase ngayon ang singer sa  Tennessee, USA at doon ay nagtatrabaho bilang tour guide sa isang museum. 

Masaya naman si Bryan sa buhay niya sa Amerika, pero minsan ay bami-miss niya ang pagkanta sa mga live show at ang TV guestings.

Pero may mga times na nagkakaroon siya ng solo concerts, o kaya’y naiimbitahang kumanta sa mga okasyon ng Filipino community sa Amerika at  minsan naman ay nagiging special guest siya sa mga concert ng ilang sikat na Pinoy singers sa Amerika, kaya naman kahit paano ay nagagawa pa rin niya ang kanyang first love, ang pagkanta.

Ilan sa naging konsiyerto nito noong nakaraang taon ang Bryan Termulo (The Prince of Teleserye Theme Songs ) Live sa Pigeon Forge TN, Miss Philippines- USA Talents Competition sa Pasadena Hilton na nakasama si Angel Bonilla at Robin Nievera, A Night of Pop and RNB sa Los Angeles Ca kasama sina Jay R at Garth Garcia  at tumanggap din ito ng award last year sa AmerAsia International Awards 2021 bilang International Male Singing Artist of the Year.

At kahit nga ibang mundo na ang ginagalawa  ni Bryan ay patuloy pa rin siyang aawit at gagawa ng kanta para sa kanyang mga tagahanga.