Bagger binaril

KRITIKAL ang kalagayan sa pagamutan ng isang bagger makaraang barilin ng hindi kilalang suspek habang nakaupo sa nakaparadang tricycle, kahapon ng umaga sa Malabon City.

Patuloy na ginagamot ng mga doktor sa Tondo Medical Center (TMC) ang biktimang kinilalang si Mark Anthony Roque, 33 anyos, residente sa Block 5 Lot 16, Brgy. Longos,sanhi ng tama ng bala sa dibdib.

Lumabas sa pagsisiyasat nina P/SSgt. Diego Ngippol at P/SSgt. Mardelio Osting ng Homicide Section ng Malabon Police, nakaupo sa nakaparadang tricycle sa harap ng Ginto Tube Ice sa Lot 5 Block 16, Brgy. Longos si Roque at naglalaro sa kanyang cellular phone nang lapitan ng suspek na nakasuot ng itim na jacket at saka nagtanong.

Nang tumugon ang biktima, biglang binunot ng hindi pa batid na kalibre ng baril ang suspek at pinaputukan si Roque na tumama sa kanyang dibdib.

Kitang-kita ng testigong si Benjamin Dorongon, 27 anyos, kasamahan sa trabaho ng biktima, ang pangyayari kaya’t kaagad niyang isinugod sa pagamutan kung saan ito patuloy na inoobserbahan.

Iniutos ni Malabon police chief P/Col. Albert Barot ang pagtugis sa suspek habang inaalam ang motibo ng pamamaril. (ROMMEL SALES)