Vin torture ang iyak ng anak — ‘di makatulog at hirap huminga

RATED R
ni Rommel Gonzales

BANGUNGOT kung ituring ni Vin Abrenica ang COVID-19 na naranasan ng kanyang pamilya.

Ayon kay Vin, nakaramdam siya ng sintomas matapos ang family gathering nila at tuluyang nagpositibo sa COVID-19. Bukod kay Vin, nagpositibo rin sa sakit ang kanyang fiance na si Sophie Albert at 10-month-old baby na si Avianna Celeste.

Mahirap para kay Vin na hindi siya makatulong noon sa pagdala sa ospital kay Avianna dahil naka-isolate siya sa isang kuwarto ng kanilang bahay.

“Naririnig mo ‘yung torture na iyak ng baby mo tapos hindi siya makatulog at saka ‘yung paghinga raw sabi ni Sophie nagwi-whistle na,” pagbabahagi ng aktor.

Sa ngayon, negatibo na sa COVID-19 si Vin at patuloy namang nagpapagaling mula sa sakit ang kanyang mag-ina.

“Sa panahon ngayon even babies. Sa ospital ang daming babies ngayon at napakahirap kapag tinamaan sila,” dagdag niya.

Na-engage sina Vin at Sophie noong December 12, 2020 at ipinanganak ang kanilang baby girl na si Avianna noong March 2021.