HATAW! D'yaryo ng Bayan hatawtabloid.com
SHOWBIZ KONEK
ni Maricris V. Nicasio
TOTOONG nakakapagod ang fight scenes ng magdyowang Diego Loyzaga at Barbie Imperial sa kanilang pelikulang Dulo ng Viva Films na idinirehe ni Fifth Solomon at mapapanood na simula ngayong araw, December 10 sa Vivamax.
Inamin din naman nina Diego at Barbie sa ilang zoom conference nila na nakaka-drain ang mga eksena nilang nag-aaway sila dahil sa napakahahabang dialogue lalo na nang sumabog na ang galit nila sa isa’t isa.
Maayos nailatag ni Fifth ang relasyon nina Dex (Diego) at Bianca (Barbie) bilang live-in partners hanggang sa magpakasal at daanan ang matitinding challenges ng young married couple.
Parehong nasa early 20s sina Dex at Bianca nang magkakilala mula sa isang dating app na pagkaraan ay napagkasunduang mag-live in. Tulad ng karaniwang relasyon, super saya ang mga unang araw at buwan ng kanilang pagsasama hanggang sa unti-unting lumalabas ang mga bagay na hindi nila napagkakasunduan.
Sa Dulo makikita ang lakas ng chemistry nina Diego at Barbie gayundin ang natural nilang acting na aminado ang dalawa na hindi sila nahirapan lalo na ‘yung pagpapakita ng kanilang sweetness. Nahirapan sila sa mga pag-aaaway nila on screen pero lumabas na totoong-totoo iyon.
Tiyak na makare-relate ang mga makakapanood sa Dulo dahil ipinakikita nina Diego at Barbie ang karaniwang nangyayari sa isang relasyon.
Kahanga-hanga naman ang galing ni Diego. Talagang may pinaghuhugutan siya lalo na sa mga eksenang galit na galit siya sa tatay niya sa kuwento na nambababae at iniwan sila ng kanyang ina.Tumodo rin si Barbie sa acting at hindi nagpahuli sa galing ni Diego.
Mapapanood na ang Dulo simula ngayong araw, Dec. 10, streaming online sa Vivamax Philippines, Hong Kong, Taiwan, Thailand, Malaysia, Indonesia, Singapore, Japan, South Korea, Macao, Vietnam, Brunei, Maldives, Australia, New Zealand, the Middle East at Europe. Available na rin ang Vivamax sa USA at Canada.
