HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
TINIYAK ni Joy Cancio na sasayaw, magcho-choreo, at magju-judge pa rin siya ng sayawan ‘pag kailangan kahit pinasok na niya ang pag-arte. First love kasi talaga niya ang pagsasayaw.
Ang pagtitiyak ay ginawa ni Joy pagkatapos pumirma ng tatlong taong kontrata kay Rams David ng Artist Circle Talent Management Services.
Ani Joy, inimbitahan siya ni Rams na maging talent niya para sa kanyang acting career. Hindi naman agad nakapagbigay ng sagot ang dating manager ng Sexbomb.
Aniya, ”Ang unang sagot ko sa kanya, pag-iisipan ko. At ipinasa-Diyos ko kung dapat ko nga bang pasukin ang pag-arte? Okey naman din kasi ako na pagkatapos ng show namin sa Net 25, iyong ‘Tagisan ng Galing.’
“Naging positibo ‘yung sagot kaya noong Lunes, Nov. 29 napapirma na ako ng kontrata kay Ateng Rams. Alaga niya rin kasi ‘yung mga dati kong alagang sina Aira at Mia Pangyarihan kaya naging madali na rin para sa akin na makapag-desisyong magpa-alaga sa kanya.”
Sinabi pa ni Joy na tiwala siya kay Rams sa kung anong project ang ibibigay sa kanya. ”Basta nilinaw ko lang sa akin na ‘yung hindi masasagasaan ang paniniwala kong espiritwal,” sambit ni Joy.
Excited na si Joy na makatrabaho ang mga artista mula GMA, TV5, at ABS-CBN dahil wala naman siyang exclusivity. ”Basta kung ano ibigay sa akin, sige lang kahit mother role o kontrabida,” ani Joy.
Happy si Joy sa bago niyang journey sa showbiz. Hangad naming marami silang project na makuha ni Ateng Rams.
