Cellphone hindi naagaw
ESTUDYANTE PINAGSAKSAK NG SNATCHER

MALUBAHANG nasugatan ang isang 17-anyos estudyante matapos pagsasaksakin ng isang snatcher nang mabigong maagaw ang kanyang cellphone sa Malabon City, kahapon ng madaling araw.

Sa imbestigasyon nina P/SSgt. Ernie Baroy at P/SSgt. Mardelio Osting, minamaneho ng binatilyong biktima ang kanyang bisikleta sa Hito St., Brgy. Longos para bumili ng pagkain.

Pagsapit sa kanto ng Block 9 dakong 12:50 am, bigla umanong sumulpot ang suspek na si Rodinito Samaro, alyas Potpot, 30 anyos, residente sa Blk 1, Lot 30, Pampano St., at tinangkang hablutin ang cellphone ng biktima ngunit hindi nagtagumpay.

Gayonman, naglabas ng icepick ang suspek at ilang ulit na inundayan ng saksak sa likod ang binatilyo bago mabilis na tumakas sa hindi matukoy na direksiyon habang nakahingi ng tulong ang biktima sa mga barangay tanod na nagsugod sa kanya sa Tondo Medical Center upang magamot.

Ipinag-utos ni Malabon police chief Col. Albert Barot ang follow-up operation para sa ikaaaresto ng suspek. (ROMMEL SALES)