McCoy at Elisse kailangan ng magpakasal para sa kanilang anak

HATAWAN
ni Ed de Leon

IKINASAL na nga raw ba sina McCoy de Leon at Elisse Joson?

Kasi ang sabi nila ang tawag ni McCoy sa kanyang partner ay “asawa ko.” Kailangan ba ang kasal para tawagin niyang “asawa ko” si Elisse?

Hindi naman eh, sa showbiz nga maririnig mo ang mga bading na ang tawag din sa lalaki nila ay “asawa ko,” pero wala namang kasal ng dalawang lalaki sa Pilipinas.

Hindi man sila mag-asawang legal, na kung sabihin nga sa legal ay “de jure,” dahil sa katotohanang sila ay nagsasama, may anak at wala naman hadlang sa kanilang pagiging mag-asawa, “de facto” ay mag-asawa sila hanggang sa magkaroon ng kuwestiyong legal sa kanilang pagsasama.

Salita lang iyang “asawa ko,” pero dapat talaga magpakasal na sila ng legal dahil may anak na sila eh. Kailangang patunayan nila na kaya nila, at responsable silang magulang ng anak nila.

Totohanin na nila dapat ang pag-aasawa, ano man ang maging epekto sa kanilang career.